వర్మ పైనా ఇప్పుడు కాపీ ముద్ర పడుతుంది. తన దగ్గర పనిచేసిన రచయిత జయ కుమార్ ఆఫీసర్ కథ తనదేనని వర్మ కు వినిపించానని, కానీ తనకు నచ్చలేదని ఇప్పుడు నాగార్జున తో సినిమా గా మలుస్తున్నాడని వివాదాస్పద వ్యాఖ్యలు చేసినాడు. అయితే అందులో ఎంత వరకు నిజం ఉందొ తెలియదు కానీ జయకుమార్ చాలా సార్లు వర్మ మీద ఇటువంటి కాపీ కామెంట్స్ చేసినాడు. ఇప్పుడు మరలా 'ఆఫీసర్' మూవీ విషయం లో చేస్తున్నాడు.
రాంగోపాల్ వర్మ గ‌త కొంత కాలంగా తీసిన సినిమాల‌నే మళ్లీ తిప్పి తిప్పి తీస్తున్నాడ‌ని విమ‌ర్శ‌లున్న సంగ‌తి తెలిసిందే. `స‌త్య-2` చిత్రాన్ని `బిజినెస్ మెన్` స్ఫూర్తిగా తీసుకుని చేసాడు. కానీ మీడియా స‌మావేశంలో నా క్రియేటివిటీ అని క‌ల‌రింగ్ ఇచ్చాడు. ఆ సినిమా చూస్తే అది పూరి క్రియేటివిటీనా? వర్మ క్రియేటివిటీనా అన్న‌ది చెడ్డీ వేసుకున్న కుర్రాడు కూడా చెబుతాడు. ఇటీవ‌ల తెర‌కెక్కించిన `గాడ్ సెక్స్ అండ్` ట్రూత్ క‌థ‌ను రైట‌ర్ జయ కుమార్ చెప్పిన క‌థ‌ను కాపీ కొట్టి తీశాడ‌ని ఆరోపించాడు. ప్ర‌స్తుతం దీనిపై సిటీ సివిల్ కోర్టు లో కేసు కూడా న‌డుస్తోంది.
`స‌ర్కార్ -3` చిత్రానికి కథ అందించింది జయకుమార్. ఆ సమయంలో వర్మ కు మొత్తం తొమ్మిది స్టోరీలు చెప్పాడుట. అప్పుడ‌వి నచ్చలేదని…ఇప్పుడే వాటిన వర్మ సినిమాలుగా తెర‌కెక్కిస్తున్నాడ‌ని…అందులో ఒక కథ `ఆఫీసర్` జయకుమార్ వాపోతున్నాడు. ఇటీవ‌ల విడుద‌లైన `ఆఫీసర్` ట్రైలర్ లో కొన్ని స‌న్నివేశాలు త‌ను చెప్పిన విధంగానే ఉన్నాయ‌ని ల‌బోదిబో మంటున్నాడు. వర్మ ఇలాగే రైట‌ర్ల‌ను తొక్కేసి పైకి వ‌స్తున్నాడ‌ని జయకుమార్ ఆగ్ర‌హంతో ఊగిపోయాడు.
