టాలీవుడ్ ఇండస్ట్రీలో మెగాస్టార్ చిరంజీవి ‘ఖైదీ నెంబర్ 150’ రీ ఎంట్రీ ఇచ్చారు. అంతకు ముందు శంకర్ దాదా జిందా బాద్ సినిమా తర్వాత రాజకీయాల్లోకి ఎంట్రీ ఇచ్చిన ఆయన కేంద్ర మంత్రిగా వ్యవహరించారు. ఆంధ్రప్రదేశ్ రాష్ట్ర విభజన తర్వాత ఏపిలో కాంగ్రెస్ ప్రాధాన్యత తక్కువ కావడంతో సినిమాలపై దృష్టి పెట్టడం మొదలు పెట్టారు. చాలా గ్యాప్ తర్వాత మంచి మేసేజ్ ఓరియెంటెడ్ సినిమాల్లో నటించాలన్న ఆయన ఆకాంక్ష ‘ఖైదీ నెంబర్ 150’ తో పూర్తయ్యింది.
తమిళంలో హీరో విజయ్ నటించిన ‘కత్తి’ సినిమా తెలుగు లో వివివినాయక్ దర్శకత్వంలో ‘ఖైదీ నెంబర్ 150’సినిమాగా తెరకెక్కించారు. ఈ సినిమాలో రైతు కష్టాలు కళ్లకు కట్టినట్లు చూపించడమే కాకుండా మాస్ మాసాల కూడా బాగా చూపించడం సినిమాకు మంచి ప్లస్ పాయింట్ అయ్యింది. ‘ఖైదీ నెంబర్ 150’ సూపర్ హిట్ కావడంతో చిరంజీవి స్టామినా ఏంటో చూపించారని..తన తదుపరి సినిమా కూడా భారీ హిట్ కొట్టాలన్న ఆలోచనలో ఉన్నారు. ఈ నేపథ్యంలో సురేందర్ రెడ్డి దర్శకత్వంలో చిరంజీవి 151వ సినిమాగా 'సైరా' రూపొందుతోంది.
స్వాతంత్ర సమరయోధులు ఉయ్యాలవాడి నరసింహారెడ్డి జీవిత కథ ఆధారంగా తీస్తున్న ఈ సినిమా బడ్జెట్ కూడా భారీ స్థాయిలోనే వెచ్చిస్తున్నారు. ఇప్పటికే ఈ సినిమా 30 శాతం వరకూ షూటింగ్ జరుపుకుంది. తాజా షెడ్యూల్ ఈ రోజున హైదరాబాద్ లో మొదలైంది. 40 రోజుల పాటు ఈ షెడ్యూల్ కొనసాగనుంది. ప్రధానమైన పాత్రలకి సంబంధించిన కొన్ని కీలకమైన సన్నివేశాలను ఇక్కడ చిత్రీకరించనున్నారు. ఈ మద్య సినిమా షూటింగ్స్ లో లీకేజ్ ల వ్యవహారం చిత్ర యూనిట్ కి పెద్ద తలనొప్పి అవుతుంది.
ఆ మద్య ఈ సినిమా షూటింగ్ లో తాను పాల్గొన్న సన్నివేశాలకి సంబంధించిన కొన్ని ఫొటోలను సామాజిక మాధ్యమాల్లో అమితాబ్ పోస్ట్ చేయడం వలన, చిరంజీవి లుక్ ఎలా ఉంటుందనే విషయం తెలిసిపోయింది. కాకపోతే ఇది పూర్తిస్థాయిలో నిజమా..కాదా అన్న సందిగ్ధంలోనే ఉన్నారు. అధికారికంగా ఈ సినిమా నుంచి చిరంజీవి ఫస్టులుక్ ను ఆయన పుట్టిన రోజైన ఆగస్టు 22వ తేదీన విడుదల చేయనున్నారు. ఆ రోజున మెగా అభిమానులకి పండుగేనని చెప్పాలి. నయనతార కథానాయికగా నటిస్తోన్న ఈ సినిమాను వచ్చే వేసవికి ప్రేక్షకుల ముందుకు తీసుకురావాలనే ఆలోచనలో వున్నారు.
