ఈ మద్య టాలీవుడ్ లో బయోపిక్ సినిమాలు వరుసగా వస్తున్న విషయం తెలిసిందే. కీర్తి సురేష్ ముఖ్య పాత్రలో అలనాటి అందాల తార..మహానటి సావిత్రి జీవిత కథ ఆధారంగా నాగ్ అశ్విన్ తెరకెక్కించిన సినిమా ‘మహానటి’మంచి విజయం సాధించింది. ప్రస్తుతం క్రిష్ దర్శకత్వంలో నందమూరి బాలకృష్ణ నటిస్తున్న ‘ఎన్టీఆర్’బయోపిక్ సినిమా షూటింగ్ షరవేగంగా జరుగుతుంది. ఈ సినిమాను రెండు భాగాలుగా ‘ఎన్టీఆర్ కథానాయకుడు’, ‘ఎన్టీఆర్ మహానయకుడు’ గా రిలీజ్ చేయబోతున్న విషయం తెలిసిందే.
రాజకీయ నేపథ్యంలో వైఎస్ రాజశేఖర్ రెడ్డి జీవిత కథ ఆధారంగా ‘యాత్ర’ సినిమా షూటింగ్ కూడా షరవేగంగా జరుగుతుంది. ఇదే సమయంలో వివాదాస్పద దర్శకుడు రామ్ గోపాల్ వర్మ ‘లక్ష్మీస్ ఎన్టీఆర్’బయోపిక్ అంటు ముందుకు వచ్చారు. అయితే లక్ష్మీ పార్వతి పాత్రలో పలువురు పేర్లు బయటకు వచ్చినా..తాజాగా ఈ సినిమాలో లక్ష్మీపార్వతి పాత్రలో ముంబై మోడల్ రూపాలి సూరి నటిస్తోందంటూ ప్రచారం మొదలైంది. లక్ష్మీస్ ఎన్టీఆర్ తిరుపతి ప్రెస్ మీట్ సమయంలో రూపాలి కనిపించడం కూడా ఈ వార్తలకు మరింత బలాన్ని ఇచ్చింది.
‘డ్యాడ్‌... హోల్డ్‌ మై హ్యాండ్‌' అనే హాలీవుడ్ సినిమాలో నటించిన ఆమె నటనను చూసి వర్మ ఈ పాత్రకు రూపాలీని తీసుకున్నట్టు వార్తలు వస్తున్నాయి. అయితే ఈ వార్తల్లో నిజం లేదంటున్నారు రాంగోపాల్ వర్మ. మా భాగస్వాముల్లో ఒకరి భార్యకు రూపాలి స్నేహితురాలు. అందుకే ఆరోజు మేము తిరుపతి వచ్చినపుడు మాతో పాటు వచ్చింది.
ఆమెకు... ‘లక్ష్మిస్ ఎన్టీఆర్' సినిమాకు ఎలాంటి కనెక్షన్ లేదు అని రామ్ గోపాల్ వర్మ తెలిపారు. కాగా, ఎన్టీఆర్ జీవితంలోకి రెండో భార్యగా లక్ష్మీ పార్వతి ఎంటరైన తర్వాత జరిగిన పరిణామాలను ఫోకస్ చేస్తూ ఈ సినిమా సాగనుంది. జనవరి 24న ఈ మూవీని ప్రేక్షకుల ముందుకు తేబోతున్నట్లు వర్మ ఇప్పటికే ప్రకటించిన సంగతి తెలిసిందే. త్వరలోనే ఈ పాత్ర ఎవరు పోషిస్తున్నారనే విషయం ప్రకటిస్తాని..అదే సమయంలో ఎన్టీఆర్ పాత్ర ఎవరేనది కూడా అప్పుడే తెలుపుతానని రామ్ గోపాల్ వర్మ స్పష్టం చేశారు.
