రాజమౌళి దర్శకత్వం లో వస్తున్న లేటెస్ట్ మల్టీ స్టారర్ #RRR మూవీ కోసం సినీ అభిమానులు ఎంతో ఆసక్తి గా ఎదురు చూస్తున్నారు . అయితే మెగా పవర్ స్టార్ రాంచరణ్, యంగ్ టైగర్ ఎన్టీఆర్ ఈ చిత్రంలో హీరోలుగా నటిస్తున్న సంగతి తెలిసిందే. గత ఏడాది నవంబర్ లో ఈ చిత్రం ప్రారంభం అయింది. ఇప్పటికే తొలి షెడ్యూల్ పూర్తయింది. రాజమౌళి ఈ చిత్ర విశేషాలేవి బయటకు రాకుండా జాగ్రత్త పడుతున్నాడు. తాజాగా ఈ చిత్ర టైటిల్ సింపుల్ గా ఉండబోతోందంటూ వార్తలు వస్తున్నాయి.
ఈ చిత్ర కథ గురించి ఇప్పటికే అనేక వార్తలు ప్రచారంలో ఉన్నాయి. స్వాతంత్ర నేపథ్యంలో ఈ చిత్రం సాగుతుందని అంటున్నారు. రాంచరణ్, ఎన్టీఆర్ స్వాతంత్ర సమరంలో మరణించి తిరిగి జన్మించి 2000 సంవత్సరం తర్వాత స్నేహితులుగా మారుతారట. ఇదే కథతో రాజమౌళి మ్యాజిక్ చేయబోతున్నట్లు వార్తలు వస్తున్నాయి. ఈ చిత్రానికి రామ రావణ రాజ్యం అనే టైటిల్ ని పరిశీలిస్తున్నట్లు గతంలో వార్తలు వినిపించాయి. ఇదిలా ఉండగా తాజా సమాచారం ప్రకారం రాజసం అనే టైటిల్ ని కూడా పరిశీలిస్తున్నారట. కథానుగుణంగా ఈ రెండు టైటిల్స్ సరిపోతాయని అంటున్నారు. కానీ చివరకు రాజమౌళి ఏ టైటిల్ వైపు మొగ్గు చూపుతాడో చూడాలి.
ఆర్ఆర్ఆర్ ఫస్ట్ షెడ్యూల్ ని చక చకా పూర్తి చేసిన రాజమౌళి తన తనయుడు కార్తికేయ వివాహ పనుల్లో బిజీగా మారాడు. ఇటీవల కార్తికేయ, పూజ వివాహం వైభవంగా జైపూర్ లో జరిగింది. ఈ వేడుకకు ఎన్టీఆర్, ప్రభాస్, రాంచరణ్, రానా, అఖిల్, జగపతి బాబు, అనుష్క లాంటి టాలీవుడ్ స్టార్స్ అంతా హాజరయ్యారు. వీలైనంత త్వరలో సెకండ్ షెడ్యూల్ ప్రారంభం కానుంది. డివివి దానయ్య నిర్మాణంలో తెరకెక్కుతున్న ఈ చిత్రానికి 300 కోట్ల బడ్జెట్ కేటాయిస్తున్నారు. రాంచరణ్, ఎన్టీఆర్ అద్భుతమైన యాక్షన్ సన్నివేశాల్లో నటించబోతున్నట్లు తెలుస్తోంది. హీరోయిన్లు, ఇతర నటీనటుల గురించి రాజమౌళి ఇంకా వివరాలు ప్రకటించలేదు.
