అవును చంద్రబాబునాయుడుకు ఏపిలో కూడా డేంజర్ బెల్స్ మొదలయ్యాయి. అందుకు తెలంగాణా ఎన్నికలే నాంధిగా నిలిచాయి. ఎలాగంటే, తెలంగాణా ప్రజానీకం చంద్రబాబునాయుడు మాటను ఏమాత్రం ఖాతరు చేయలేదు. తెలంగాణా ఎన్నికల్లో టిడిపి పోటీ చేసిన 12 నియోజకవర్గాల్లో చంద్రబాబు ఆరు స్ధానాల్లో ప్రచారం చేశారు. అదే విధంగా మహాకూటమిలో భాగంగా కాంగ్రెస్ అభ్యర్ధులు పోటీ చేసిన మరికొన్ని నియోజకవర్గాల్లో కూడా ప్రచారం చేశారు. విషయం ఏమిటంటే, చంద్రబాబు ప్రచారం చేసిన ఏ ఒక్క నియోజకవర్గంలో కూడా మహకూటమి అభ్యర్ధులెవరూ గెలవలేదు. విచిత్రమేమిటంటే, తెలంగాణాలో సీమాంధ్రుల ప్రభావం ఎక్కువగా ఉండే నియోజకవర్గాల్లో కూడా మహాకూటమి అభ్యర్ధులు ఎక్కడా గెలవలేదు.

వెల్లడైన ఫలితాలను బట్టి ఏమర్ధమవుతోంది ? చంద్రబాబు మాటలను తెలంగాణా జనాలే కాదు కనీసం సీమాంధ్రులు కూడా పట్టించుకోలేదు. చంద్రబాబు తన ప్రసంగాల్లో కెసియార్ పై డైరెక్ట్ యటాక్ చేయటానిక భయపడింది వాస్తవం. అయితే, నరేంద్రమోడిని, ఫిరాయింపు ఎంఎల్ఏలను చిత్తు చిత్తుగా ఓడించమని మాత్రం గొంతు చించుకుని మరీ చెప్పారు. హైదరాబాద్ ను కట్టింది తానే అన్నారు. సైబరాబాద్ తన సృష్టే అన్నారు. ఔటర్ రింగ్ రోడ్డు, శంషాబాద్ విమానాశ్రయాన్ని తానే నిర్మించానని అబద్దాలు కూడా చెప్పారు. అయినా జనాలు నమ్మలేదు, పట్టించుకోలేదు. చంద్రబాబు ఓడించమని చెప్పిన ఫిరాయింపులను జనాలు బ్రహ్మాండంగా గెలిపించారు.

సనత్ నగర్ లో తలసాని శ్రీనివాసయాదవ్, జూబ్లిహిల్స్ లో మాగంటి గోపీనాధ్, కుకట్ పల్లిలో మాధవరం కృష్ణారావు, శేరిలింగం పల్లిలో ఆరెకపూడి గాంధి లాంటి వాళ్ళని ఓడించమని చంద్రబాబు నెత్తీ నోరు మొత్తుకున్నారు. అయినా జనాలు వాళ్ళని పెద్ద మెజారిటీతో గెలిపించారు. ఏపిలో 23 మంది వైసిపి ఎంఎల్ఏలను ప్రలోభాలకు గురిచేసి ఫిరాయించేట్లు చేసిన చంద్రబాబు అదే ఫిరాయింపులను తెలంగాణాలో ఓడించమంటే జనాలు ఎలా ఒప్పుకుంటారు ? చంద్రబాబు ఎటూ చెప్పాడు కాబట్టి ఫిరాయింపు ఎంఎల్ఏలు, ఎంపిలను ఏపి ఎన్నికల్లో ఓడిస్తారేమో చూడాలి.