ఎన్నికల సమయంలో కాంగ్రెస్ పార్టీకి సెల్ఫ్ గోల్స్ కొత్తేమీ కాదు. గత ఎన్నికల సమయంలో మణిశంకర్ అయ్యర్ వేసిన సెల్ఫ్ గోల్స్ తో ఆ పార్టీ ఆత్మరక్షణలో పడిపోయింది. ఇప్పుడు కూడా అలాంటి సెల్ఫ్ గోల్ ఒకటి పడింది. ఆ పార్టీ విదేశీ వ్యవహారాల పర్యవేక్షకుడు శ్యా పిట్రోడా ఈ గోల్ వేశారు. దీంతో కాంగ్రెస్ పార్టీకి ఏం చేయాలో దిక్కు తోచట్లేదు.
భారత్ – పాక్ అంశం లేకుండా అక్కడకానీ, ఇక్కడ కానీ ఎన్నికలుండవ్. ఇప్పుడు కూడా బీజేపీ సర్జికల్ స్ట్రైక్స్ అస్త్రంగా చేసుకుని ముందుకెళ్తోంది. ఈ నేపథ్యంలో జమ్ము కశ్మీర్ లోని పుల్వామాలో జరిగిన ఉగ్రదాడిపై కాంగ్రెస్ పార్టీ అంతర్జాతీయ వ్యవహారాల నిపుణుడు శ్యాం పిట్రోడా సంచలన వ్యాఖ్యలు చేశారు. “పుల్వామాలో జరిగిన దాడిపై పాకిస్తాన్ ను నిందించలేం” అన్నారు. గతంలో కూడా ముంబైలో దాడులు జరిగాయన్న ఆయన.. ఆ తర్వాత తాము వెళ్లి పాకిస్తాన్ లో దాడులు చేయలేదన్నారు. ఇలాంటి వ్యవహారాలను డీల్ చేసే పద్ధితి ఇది కాదన్నారు. కొంతమంది ఉగ్రవాదులు చేసిన పనికి పాకిస్తాన్ ను నిందించలేమన్నారు.
ఇప్పుడు శ్యాం పిట్రోడా వ్యాఖ్యలు ఆ పార్టీకి పెద్ద తలనొప్పిగా మారాయి. పిట్రోడా వ్యాఖ్యలు వ్యక్తిగతమని, పార్టీకి సంబంధం లేదని ఆ పార్టీ ఖండించింది. పిట్రోడా కామెంట్స్ ఇప్పుడు బీజేపీకి అస్త్రంలా మారాయి. పిట్రోడా వ్యాఖ్యలపై ప్రధాని మోదీ ట్విట్టర్లో స్పందించారు. నాడు పాక్ ప్రేరేపిత ఉగ్రవాదంపై కాంగ్రెస్- యూపీఏ ప్రభుత్వాలు ఎలాంటి చర్యలు తీసుకోలేదని దుయ్యబట్టారు. కాంగ్రెస్ పార్టీకి అత్యంత ఆప్తుడైన పిట్రోడా కామెంట్స్ పై ఆ పార్టీ నేతలు ఇప్పుడు ఏమంటారని ఆయన ప్రశ్నించారు.
పిట్రోడా కామెంట్స్ ఇప్పుడు కాంగ్రెస్ పార్టీకి చిక్కులు తెచ్చిపెట్టాయి. మణిశంకర్ అయ్యర్ ఎన్నికల ముందు సరిగ్గా ఇలాంటి కామెంట్స్ తోనే చిక్కులు తెచ్చిపెట్టారు. ఇప్పుడు మేధావిగా పేరొందిన శ్యాంపిట్రోడా కామెంట్స్ తో ఆ పార్టీకి ఏం చేయాలో పాలుపోని పరిస్థితి ఏర్పడింది.
