గోంగూర చట్నీ.. గోంగూర పప్పు.. గోంగూర చికెన్.. ఇలా ఎన్నో రకాల కూరలు చేసుకొని తిని ఉంటాము. అవి ఎంతో రుచిగా నోటి తగలగానే కరంగా అబ్బా ఇలా నోరు ఊరిస్తూ అద్భుతంగా ఉంటాయి. అయితే ఈ గోంగూరను చికెన్ లాంటి మీల్ మేకర్ తో కలిపి తింటే ఎంతో అద్భుతంగా ఉంటుంది. అయితే ఈ గోంగూర మీల్ మేకర్ ఎలా చేసుకోవాలి అనేది ఇక్కడ చదివి తెలుసుకోండి.
కావలసిన పదార్థాలు...
మీల్‌మేకర్‌ -100 గ్రా.,
గోంగూర - 2 కట్టలు,
ఉల్లిపాయలు - 2,
పచ్చిమిర్చి - 4,
ఎండుమిర్చి - 2,
వెల్లుల్లి - 6 రేకలు,
జీలకర్ర - అర టీ స్పూను,
కారం - 1 టీస్పూను,
పసుపు - చిటికెడు,
నూనె - 1 టేబుల్‌ స్పూను,
వేగించిన నువ్వుల పొడి - అరకప్పు,
ఉప్పు - రుచికి తగినంత.
తయారీ విధానం...
గోరు వెచ్చని నీటిలో కొద్దిగా ఉప్పు వేసి మీల్‌మేకర్‌ని 10 నిమిషాలు నానబెట్టి నీరు పిండి పక్కనుంచాలి. నూనెలో జీలకర్ర, ఎండుమిర్చి, వెల్లుల్లి, ఉల్లి తరుగు, పచ్చిమిర్చి వేగించి మీల్‌మేకర్‌ కలపాలి. 5 నిమిషాల తర్వాత గోంగూర వేసి మూతపెట్టాలి. 2 నిమిషాల తర్వాత కారం, పసుపు, ఉప్పు చల్లి 2 కప్పుల నీరు పోసి మూత పెట్టి మగ్గించి దించెయ్యాలి. ఈ కూర అన్నంతో కలుపుకుంటే మటన్‌ గోంగూర తిన్న ఫీలింగ్‌ వస్తుంది. ఇంకెందుకు ఆలస్యం వెంటనే ఇంట్లో ట్రై చెయ్యండి. గోంగూర మీల్ మేకర్ అదిరిపోతుంది.
