2004లో యువసేన సినిమాతో హీరోగా పరిచయం అయిన శర్వానంద్, తరువాత గౌరీ, శంకర్ దాదా ఎం బీ బీ ఎస్, సంక్రాంతి సినిమాల లో సపోర్టింగ్ రోల్స్‌లో కనిపించాడు. తరువాత మరోసారి వెన్నెల సినిమాలో లీడ్ రోల్‌లో ఆకట్టుకునే ప్రయత్నం చేశాడు. ఆ తరువాత కూడా హీరోగా చేస్తూనే సపోర్టింగ్ రోల్స్‌ లోనూ కనిపించాడు శర్వా. ఈ యంగ్ హీరో కెరీర్‌లో తొలి బ్రేక్ గమ్యం సినిమాతో వచ్చింది. క్రిష్ దర్శకత్వంలో వచ్చిన ఈ సినిమా లో అల్లరి నరేష్‌తో పాటు మరో హీరోగా నటించాడు.
అయితే ఈ సినిమా సూపర్ హిట్ అయిన శర్వానంద్ కెరీర్‌కు కావాల్సిన బూస్ట్ రాలేదు. ఇక శర్వానంద్ కు నటుడిగా బ్రేక్ ఇచ్చిన తొలి సినిమా ప్రస్థానం. దేవా కట్టా దర్శకత్వంలో తెరకెక్కిన ఈ సినిమా లో సాయి కుమార్ కీలక పాత్రలో నటించగా శర్వా హీరోగా నటించాడు. ఈ సినిమా శర్వా కెరీర్‌ నే కాదు ఇండస్ట్రీనే మలుపు తిప్పింది. ఈ సినిమాతో శర్వాలోని నటుడు ఇండస్ట్రీకి పరిచయం అయ్యాడు. అప్పటి వరకు సపోర్టింగ్ రోల్స్‌, మాత్రమే చేసిన శర్వాకు ప్రస్థానం తరువాత పర్ఫామెన్స్‌కు స్కోప్ ఉన్న పాత్రలు ఇవ్వటం మొదలైంది.
ఈ సినిమా కమర్షియల్‌గా వర్క్ అవుట్ కాకపోయినా క్లాసిక్‌ గా పేరు తెచ్చుకుంది. అందుకే ఈ సినిమా ను ఇతర భాషల్లో రీమేక్ చేసేందుకు కూడా ఆఫర్లు వచ్చాయి. అయితే చాలా ఏళ్ళ తరువాత ఇటీవలే ఈ సినిమా హిందీ రీమేక్ ప్రేక్షకుల ముందుకు వచ్చింది. దేవా కట్ట దర్శకత్వంలోనే తెరకెక్కిన ఈ సినిమాలో సాయి కుమార్ పాత్రలో సంజయ్ దత్‌ నటించాడు. అంతేకాదు ఈ సినిమాను స్వయంగా సంజయ్ దత్తే నిర్మించటం విశేషం.
