నేడు 65వ జాతీయ ఉత్తమ చలనచిత్ర అవార్డులను అధికారికంగా ప్రకటించారు. జ్యూరీకి నాయకత్వం వహిస్తున్న దర్శకుడు శేఖర్ కపూర్ ఈ అవార్డులను ఢిల్లీలోని శాస్త్రి భవన్ లో ప్రకటించారు. అయితే ఈ జాతీయ అవార్డులు తెలుగు చిత్రాలకు బాగానే లభించాయి. సంకల్ప్ రెడ్డి దర్శకత్వంలో రానా నటించిన ‘ఘాజీ’ బెస్ట్ తెలుగు ఫిల్మ్ అవార్డు దక్కింది. ఇదే సమయంలో 'బాహుబలి-2'కి మూడు అవార్డులు లభించాయి.
బాహుబలి,బాహుబలి 2 చిత్రాలు జాతీయ స్థాయిలో ఎన్నో అవార్డులు సాధించాయి. ప్రపంచ స్థాయిలో ఈ చిత్రం గొప్ప పేరు తెచ్చకుంది. అంతే కాదు బాహుబలి 2 భారతీయ చలన చిత్ర రంగంలో అత్యధిక వసూళ్లు చేసిన చిత్రంగా నిలిచింది. ఈ చిత్రంలో నటించిన నటులకు జాతీయ స్థాయిలో గుర్తింపు లభించింది. తాజాగా 65వ జాతీయ ఉత్తమ చలనచిత్ర అవార్డుల బాహుబలి విషయంలో పొరపాటు జరిగినట్లు ఆ చిత్ర యూనిట్ తెలుపుతుంది.
బాహుబలి ది కంక్లూజన్ యాక్షన్ డైరెక్టర్ అబ్బాస్ అలీ మొఘల్‌ను బెస్ట్ యాక్షన్ డైరెక్టర్‌గా జ్యూరీ ప్రకటించింది. ‘బాహుబలి’ యాక్షన్ డైరెక్టర్ విషయంలో పెద్ద తప్పే జరిగినట్టు తెలుస్తోంది. ఈ విషయాన్ని ఆ చిత్ర నిర్మాత శోభు యార్లగడ్డ స్వయంగా ట్విట్టర్ ద్వారా వెల్లడించారు. ‘అబ్బాస్ అలీ మొఘల్ ఎవరు? ఆయన అసలు బాహుబలి-1 లేదంటే 2కి పని చేయలేదు’ అని ట్విట్టర్ ద్వారా పేర్కొన్నారు. అసలు ‘బాహుబలి’కి యాక్షన్ డైరెక్టర్‌గా పీటర్ హెయిన్ పని చేశారు.
