తమిళ ఇండస్ట్రీలో స్టార్ హీరో విజయ్ విజయ్ నటించిన చిత్రాలకు ఈ మద్య వరుసగా అభ్యంతరాలు వ్యక్తం అవుతున్నాయి. తాజాగా విజయ్, దర్శకుడు మురుగదాస్ కాంబినేషన్ లో తెరకెక్కిన చిత్రం 'సర్కార్'. ఈ చిత్రం దీపావళి కానుకగా రిలీజ్ అయ్యింది...మొదటి నుంచి ఈ చిత్రంపై రక రకాలు విమర్శలు వస్తున్నాయి. కాగా, థియేటర్లలో రిలీజ్ అయిన తర్వాత ఈ వివాదాలు మరింత తీవ్ర రూపం దాల్చాయి. ఈ చిత్రంలో కొన్ని రాజకీయ పార్టీలను కించపరిచే విధంగా సన్నివేశాలు ఉన్నాయంటూ తమిళ నాడు ప్రభుత్వం, ఇతర పార్టీలు భగ్గుమంటున్నాయి.
అంతేకాదు ఈ చిత్రంలో అభ్యంతరకర సన్నివేశాలను తొలగించాలని అన్నాడీఎంకె పార్టీ నేతలు కోరారు. కానీ అలాంటి సన్నివేశాలు తొలగించకుండా చిత్రాన్ని కొన్ని థియేటర్లలో ఆడిస్తున్నారు. దాంతో నిరసనకారులు థియేటర్లకు చేరుకొని విధ్వంసాలను సృష్టిస్తున్నారు. దీంతో తమిళనాడులో చాలా థియేటర్లలో చిత్రాన్ని రద్దు చేశారు. ఈ నేపథ్యంలో ‘సర్కార్’చిత్రంలో అభ్యంతరకర సన్నివేశాలను తొలగించాలని థియేటర్స్ అసోసియేషన్ చిత్రనిర్మాతలపై ఒత్తిడి తీసుకొస్తున్నారు. సన్నివేశాలను తొలగించలేకపోతే చిత్రాన్ని ప్రదర్శించలేమని అంటున్నాయి థియేటర్ యాజమాన్యాలు.
ఇక తమిళనాట దర్శకుడు మురుగదాస్ ని అరెస్ట్ చేశారనే వార్తలు తెగ హల్ చల్ చేస్తున్నాయి. ఈ నేపథ్యంలో దర్శకుడు మురుగదాస్ మద్రాస్ హైకోర్టుని ఆశ్రయించి ముందస్తు బెయిల్ కోసం కోర్టుని ఆశ్రయించినట్లు తెలుస్తోంది. అయితే ‘సర్కార్’ చిత్రంలో ప్రభుత్వాన్ని కించపరిచే విధంగా సన్నివేశాలు ఉన్నాయని కమీషనర్ కి అన్నాడీఎంకె మద్దతుదారుడు దేవరాజన్ ఫిర్యాదు చేశారు.
