తెలుగు ఇండస్ట్రీలో మకుటం లేని మహరాజుగా వెలిగిపోయిన మహానటులు ఎన్టీఆర్ జీవిత కథ ఆధారంగా క్రిష్ దర్శకత్వంలో నందమూరి బాలకృష్ణ నటిస్తున్న ‘ఎన్టీఆర్’బయోపిక్ త్వరలో ప్రేక్షకుల ముందుకు రాబోతుంది. ఈ చిత్రానికి సంబంధించిన ప్రీ రిలీజ్ ఫంక్షన్ హైదరాబాద్ లో జరిగింది. ఎన్టీఆర్ బయోపిక్ రెండు భాగాలు గా రిలీజ్ చేయబోతున్న విషయం తెలిసిందే.
ఆయన నటనా జీవితం ఆధారంగా ‘ఎన్టీఆర్ కథానాయకుడు’, రాజకీయ జీవితం ఆధారంగా ‘ఎన్టీఆర్ మహానాయకుడు’గా రిలీజ్ చేయబోతున్నారు. ఈ చిత్రంలో పలువురు ప్రముఖ నటులు కనిపించనున్న సంగతి తెలిసిందే. సంక్రాంతి సందర్భంగా జనవరి 9వ తేదీన ఈ సినిమా మొదటి భాగం విడుదల కాబోతోంది.
ప్రీ-రిలీజ్ ఈవెంట్లో విడుదలైన చిత్రానికి సంబంధించిన ట్రైలర్ అభిమానులను ఆకట్టుకుంటోంది. ఇప్పటి వరకు ఈ ట్రైలర్ను యూట్యూబ్లో కోటి మంది వీక్షించారు. ఆ విషయాన్ని తెలియజేస్తూ చిత్రబృందం ఓ పోస్టర్ను విడుదల చేసింది. ఈ సినిమా రెండో భాగం ఫిబ్రవరి 7వ తేదీన విడుదల కాబోతున్న సంగతి తెలిసిందే.