అర్జున్ రెడ్డి సినిమా ద్వారా కమెడియన్ గా బాగా పాపులరైన రాహుల్ రామకృష్ణ ట్విట్టర్ అకౌంట్ క్లోజ్ చేశాడు. ఈయన మరో కమెడియన్ ప్రియదర్శితో కలసి నటించిన మిఠాయి చిత్రం ఇటీవల విడుదలైంది. మొదటి రోజునే నెగిటివ్ టాక్ తెచ్చుకుంది.
ఈ చిత్రం ఘోరపరాజయంపై రాహుల్ రామకృష్ణ ట్విట్టర్ ద్వారా స్పందించాడు. ఈ చిత్రం నిరాశపరిచినందుకు తన అభిమానులకు క్షమాపణలు చెప్పేశాడు. ఈ సినిమాను కాపాడేందుకు చివరి నిమిషం వరకూ తాము ప్రయత్నించామని అవేమీ ఫలించలేదని కామెంట్ చేశాడు.
మరో మంచి చిత్రంతో మీ ముందు వస్తామని ప్రకటించాడు. పాపం.. సినిమా విడుదలైన వెంటనే ఈ స్థాయిలో సారీ చెప్పుకున్నా నెటిజన్లు మాత్రం రాహుల్ రామకృష్ణను కరుణించలేదు. దారుణంగా ట్రోలింగ్ చేయడం ప్రారంభించారు. భయంకరమైన కామెంట్లు పెట్టారు.
దీంతో ఈ గోల భరించలేక రాహుల్ రామకృష్ణ తాత్కాలికంగా ట్విట్టర్ ఎకౌంట్ క్లోజ్ చేశారు. పెళ్లి చూపులు ద్వారా కమెడియన్ గా పాపులరైన ప్రియదర్శికి కూడా ఈ మిఠాయి చేదు అనుభవమే. రాహుల్ రామకృష్ణ, ప్రియదర్శి..ఇద్దరూ టాలెంటెడే.. మరో మంచి ఛాన్స్ కోసం ఎదురు చూడటం మినహా వీరు ఇప్పుడు చేయగలిగిందేమీ లేదు.
