ఢిల్లీలో సరి బేసి విధానంతో ఉపయోగం లేదని సుప్రీంకోర్టు తేల్చేసింది. రాజధానిలో వాయుకాలుష్యం పెరగడంపై ఆగ్రహం వ్యక్తం చేసింది. మరోవైపు సరి బేసి విధానం శుక్రవారం ముగియడంతో.. పొడిగింపుపై సోమవారం నిర్ణయం తీసుకుంటామన్నారు సీఎం కేజ్రీవాల్.
ఢిల్లీలో వాయు కాలుష్యంపై సుప్రీంకోర్టులో విచారణ జరిగింది. సరి-బేసి విధానం అమల్లో ఉన్న రోజుల్లో వాయుకాలుష్య తీవ్రత వివరాలను కేంద్ర కాలుష్యనియంత్రణ మండలి సుప్రీంకోర్టుకు అందజేసింది. సరి-బేసి విధానం అమలు వల్ల ఉపయోగం లేదనీ, ఆ విధానం అమల్లో ఉన్న రోజుల్లో కూడా గాలి కాలుష్యం తగ్గలేదని తెలిపింది. పంజాబ్‌, హరియాణా, యూపీ, ఢిల్లీ ప్రభుత్వ ప్రధాన కార్యదర్శులు నవంబరు 29న సుప్రీంకోర్టుకు హాజరుకావాలని ఆదేశించింది. సరి-బేసి విధానం కాలుష్య నియంత్రణకు సరైన పరిష్కారం కాదని సుప్రీంకోర్టు అభిప్రాయపడింది.
ఢిల్లీలో ఇంకా డీజిల్‌, కిరోసిన్‌ వాహనాల వినియోగాన్ని ఎందుకు నివారించలేకపోతున్నారో చెప్పాలని కేజ్రీవాల్ ప్రభుత్వాన్ని ప్రశ్నించిన సుప్రీంకోర్టు. నియంత్రణ చేయలేకపోయిన అధికారులను ఎందుకు బాధ్యులను చేయకూడదని ప్రశ్నించింది. ఢిల్లీలో గాలి నాణ్యత పెంచడానికి సరైన మార్గదర్శకాలను ఏడు రోజుల్లోగా రూపొందించాలని కేంద్ర ప్రభుత్వానికి సర్వోన్నత న్యాయస్థానం ఆదేశాలు జారీ చేసింది.
