53 రోజుల సమ్మె అనంతరం కూడా కెసిఆర్ ప్రభుత్వం చర్చలకు ముందుకు రాలేదు కార్మిక సంఘాలే ఒక మెట్టు క్రిందికి దిగి సమ్మె విరమించిన కెసిఆర్ ఉద్యోగులను విదులోకీ తీసుకోక పోవడం తో కార్మికుల ఆత్మహత్య యత్నాలకు పాలుపడిన చలించలేదు అంటూ ఓ కార్మికుడు విరక్తి చెంది తన ఉద్యోగాని కి రాజీనామా చేస్తూ కెసిఆర్ కు ఒక లేఖ రాసుకున్నాడు . 

 

గౌరవనీయులైన తెలంగాణ సీఎం కేసీఆర్ గారికి..

‘మీ బంగారు తెలంగాణాలో ఉద్యోగం కోల్పోయిన ఉద్యోగిని కాదు. మీ మాయ మాటలు నమ్మి మోసపోయిన తెలంగాణ సమాజంలోని వ్యక్తిని. మీ తెలంగాణ రాష్ట్రంలో నిరుద్యోగిగా ఉన్నాను కాబట్టి తక్షణమే నా తల్లిదండ్రులకు వృద్ధాప్య పింఛను ఇవ్వండి. నా పేరు మీద సెంటు భూమి కూడా లేదు. కాబట్టి 3 ఎకరాల పొలం ఇవ్వండి. నా పిల్లలకు ప్రభుత్వ స్కూల్లో చదువు చెప్పించండి. నాకు ఉండటానికి ఇల్లు లేదు కాబట్టి డబుల్ బెడ్ రూమ్ ఇల్లు ఇవ్వండి. ఒకవేళ మీరు ఇవన్నీ ఇవ్వకున్నా.. సమాజంలో కనీసం గౌరవంగా బతికే అవకాశం కల్పించండి..’ అంటూ కృష్ణ తన లేఖలో రాసుకొచ్చాడు.

 

‘మీరు (కేసీఆర్) ఉద్యోగంలో నుంచి తీసేయడం కాదు, నేనే నా ఉద్యోగానికి రాజీనామా చేస్తున్నా.. తక్షణం నా రాజీనామా లేఖను ఆమోదించండి. ఆర్టీసీ నుంచి రావాల్సిన బకాయిలను వెంటనే ఇప్పించండి’ అని లేఖలో కృష్ణ కోరారు.తెలంగాణ రాష్ట్రంలో ఆత్మగౌరవంతో ఉద్యోగం చేద్దామనుకున్న, ఆత్మగౌరవంతో బతుకుదాం అనుకున్నా కానీ, మీలాంటి గొప్ప మనిషి ఉన్న ఈ రాష్ట్రంలో ఆత్మగౌరవంతో కాదు కదా కనీసం తెలంగాణలో ఎందుకు పుట్టాను రా నాయనా అనే విధంగా తీవ్ర మానసిక వేదనకు గురై నేను ఈ నిర్ణయం తీస్కుంటున్నా..మీకు మాట తప్పడం, మాయమాటలు చెప్పి మోసం చెయ్యడం తెలుసునని మా కార్మిక లోకం లేట్‌గా తెలుసుకుంది.

 

మీరు ఉద్యోగంలో నుంచి తీసేయడం కాదు, నేనే నా ఉద్యోగానికి రాజీనామా చేస్తున్నా. దానికి కారణం లేకపోలేదు సర్, మా తెలంగాణలో నియంతృత్వం చూస్తా అని అనుకోలేదు.1200 మంది ఆత్మహత్య చేసుకుంటే మన కేసీఆర్ సర్ ఉన్నారు, ఆంధ్ర పాలకులు నిజంగా మోసం చేశారేమో, మనల్ని బాగా చూసుకుంటారు అనుకున్న. కానీ, సర్ మా 30 మంది కార్మికులు చనిపోతే మీరు కనీసం స్పందించలేదు చూడండి.. సర్ అప్పుడు అనిపించింది తెలంగాణ మా కోసం కాదు తెలంగాణా కేవలం మీ లాంటి నాయకుల కోసమే అని.నా అక్క చెల్లెమ్మలు లాఠీ దెబ్బలు తింటారని కలలో కూడా ఊహించలేదు సర్. కానీ, మీ బంగారు తెలంగాణలో అది సాధ్యమైంది. సర్, నా చెల్లెలు ఏడుస్తుంటే, రోజూ నా సోదరులు బాధ పడుతుంటే తట్టుకోలేకపోతున్నా.. సర్ కానీ, ఒక్కటి మాత్రం నిజం సర్, నా ఆర్టీసీ అక్కచెల్లెల ఉసురు కచ్చితంగా మీకు తగులుతుంది సర్.

 

మీరు ఉద్యమ నాయకుడిగా ఉన్నప్పుడు మాట్లాడిన మాటలు ఒక్కసారి గుర్తు తెచ్చుకోండి. ఇప్పుడు మీ వైఖరి గుర్తు చేసుకోండి. పాపం సర్, ఆర్టీసీ వాళ్లు మీమ్ములను చాలా అభిమానించారు సర్. మీరిలా చేస్తారని కలలో కూడా ఉహించి ఉండరు సర్.

 

ఆర్టీసీ ఉద్యోగులు వారికి వచ్చే రూ.15000 జీతం తీసుకొని ఫ్యామిలీని చూసుకుంటూ చాలా గౌరవంగా బతుకుతున్నారు సర్. మీరూ వాళ్లకు ఏమి ఇవ్వకున్నా.. కనీసం పిలిచి మాట్లాడి ఉండుంటే మీ మీద గౌరవంతో ప్రాణాలు ఇచ్చేవారు సర్. కనీసం నేను మీ బంగారు తెలంగాణలో సంతోషంగా లేను, మా తల్లిదండ్రులు సర్ కనీసం వాళ్లను అయినా సంతోషంగా ఉండేటట్లు నెల నెలా వారికి వృద్దాప్య పింఛన్ ఇవ్వండి. ఎందుకంటే మిమ్ముల్ని నమ్మి వాళ్లు మా కేసీఆర్ అంటూ మీకు ఓటు వేశారు సర్. వాళ్లు బాధ పడుతుంటే సమాజంలో ప్రతి ఒక్కరూ చిన్న చూపు చూస్తుంటే, ప్రతి ఒక్కరూ నన్ను దీనంగా చూస్తుంటే తట్టుకోలేక పోయాను సర్.

 

రోజూ ఈ అరెస్టులు ఏంది, ఈ లాఠీ దెబ్బలు ఏంది.. నా ఆర్టీసీ సోదరులు ఏమి తప్పు చేశారు? ఇంకా ఎంత మందిని ఆత్మహత్యలు చేసుకునేట్టు చేస్తారు. ఇవన్నీ భరించలేకే ఈ నిర్ణయం. నా ఆత్మాభిమానాన్ని చంపుకొని ఉద్యోగం చేయలేను. నేను మీ బంగారు తెలంగాణాలో ఉద్యోగం కోల్పోయిన ఉద్యోగిని కాదు. మీ మాయ మాటలు నమ్మి మోసపోయిన తెలంగాణ సమాజంలోని వ్యక్తిని. మీ తెలంగాణలో నిరుద్యోగిగా ఉన్నాను కాబట్టి తక్షణమే నా తల్లిదండ్రులకు వృద్ధాప్య పింఛను ఇవ్వండి. సెంటు భూమి లేని నాకు మూడెకరాల పొలం, అలాగే నా పిల్లలకి ప్రభుత్వ స్కూల్లో చదువు, నాకు ఉండటానికి డబుల్ బెడ్ రూమ్ ఇల్లు ఇవ్వండి. ఒకవేళ మీరు ఏమీ ఇవ్వకున్నా, సమాజంలో గౌరవంగా బతికే అవకాశం కల్పించాలని కోరుతూ.. నా ఉద్యోగ రాజీనామాను తక్షణమే ఆమోదించగలరు.

ఇట్లు/
L కృష్ణ (స్టాఫ్ నెంబర్ 176822)
RTC కండక్టర్, సూర్యాపేట డిపో.