21వ శతాబ్దంలో ఉన్నా ఇంకా కొన్ని చోట్ల సాంఘిక దురాచారాలు కొనసాగుతూనే ఉన్నాయి. అవగాహన లేక.. మూఢనమ్మకాలను ఇంకా పట్టుకుని వేలాడుతూనే ఉన్నారు. ప్రత్యేకించి మహిళలు ఎక్కువగా ఈ అనాచారాలకు బలవుతున్నారు. మహా రాష్ట్రలోని ఓ సామాజిక వర్గంలో పెళ్లిరోజే వధువుకు కన్యత్వ పరీక్ష నిర్వహించే దురాచారం ఉంది. ఇది ఇప్పుటికీ కొనసాగుతూనే ఉంది.
మహారాష్ట్రంలోని కంజర్భట్ సామాజిక వర్గంలో పెళ్లి రోజే అమ్మాయి కన్యా కాదా అన్న విషయం తేల్చేందుకు ఓ విషమ పరీక్ష నిర్వహిస్తారు. పెళ్లవగానే అమ్మాయిని, అబ్బాయినీ ఓ హోటల్ గదిలోకి శోభనం కోసం పంపిస్తారు. ఈ గదిలో బెడ్ పై కేవలం తెల్లని వస్త్రాలు మాత్రమే ఉంచుతారు. మొదటి కలయికలో వధువుకు రక్తస్రావం అయితే ఆ అమ్మాయిని కన్యత్వ పరీక్ష పాస్ అయినట్టు.
వధువుకు రక్తస్రావం కాని పక్షంలో ఆ అమ్మాయి కన్య కాదని.. అంతకుముందే ఆమెకు లైంగిక సంబంధాలు ఉన్నట్టు నిర్థారిస్తారు. దీని పరిణామాలు చాలా తీవ్రంగా ఉంటాయి. పెళ్లి వేదిక వద్దే అమ్మాయిని కొట్టడం, తిట్టడం జరుగుతుంది. చాలా పెళ్లిళ్లు ఆగిపోతాయి కూడా. ఈ దురాచారంపై ఇప్పుడు అదే సామాజిక వర్గానికి చెందిన వివేక్ తమైచికర్ అనే యువతి ఉద్యమిస్తోంది.
ఈ కన్యత్వ పరీక్షలను ఆపాలంటూ తమ సామాజిక వర్గంలోని యువకులకు ఆమె పిలుపు ఇస్తోంది. 'స్టాప్‌ ద వి రిచువల్ ' పేరుతో ఓ వాట్సాప్ గ్రూపును ప్రారంభించింది. పెళ్లికాని వివేక్ తమైచికర్ తాను కన్యత్వ పరీక్షలో పాల్గొనేది లేదని తేల్చి చెప్పింది. తనలాగే యువతీ యువకులు ఈ పరీక్షలను తిరస్కరించాలని అంటోంది. కానీ కొందరు కులపెద్దలు ఈ ఉద్యమాన్ని వ్యతిరేకిస్తున్నారు.
