ఈ మద్య ఫేక్ ఫోన్ కాల్స్ తో ఎన్నో ఇబ్బందులు వచ్చిపడుతున్నాయి. కొంత మంది ఫైనాన్స్ పరంగా దెబ్బతీస్తే..మరికొంత మంది జీవితాలతోనే ఆడుకుంటున్నారు. తాజాగా ప్రకాశం జిల్లా చీరాలలో పోలీసులు ఛేదించిన ఓ కేసు సంచలనం సృష్టిస్తోంది. ఇద్దరు యువకులతో కలసి ముఠాగా ఏర్పడిన ఓ యువతి డబ్బున్న కుటుంబాల పిల్లలను టార్గెట్ చేస్తూ డబ్బులు దోచేస్తోంది. సినీ ఫక్కీలో వీరి బాగోతం కొనసాతుంది..మొదట ఆ యువతి మిస్ కాల్ ఇస్తుంది..ఆ తర్వాత కాస్త హాట్ హాట్ గా మాట్లాడుతూ.. తన ఇంటికి రమ్మని పిలవడం జరుగుతుంది. ఆమె మాటలు నమ్మి ఇంటికి వెళ్లారో అంతే..ఒళ్లు..డబ్బు గుళ్ల. వివరాలకు వెళితే, చీరాల పరిధిలోని పేరాలకు చెందిన కంపా స్రవంతి ప్రియ, కుంభా ప్రకాష్, కావటి కిరణ్ లు ఓ ముఠాగా ఏర్పడ్డారు.
డబ్బున్న కుటుంబాల పిల్లలను టార్గెట్ చేస్తూ డబ్బులు దోచేస్తోంది. తొలుత మిస్డ్ కాల్ ఇచ్చి, ఆపై వారిని మెసేజ్ లు, ఫోన్ కాల్స్ వరకూ తీసుకెళ్లి, భారీ స్థాయిలో డబ్బు డిమాండ్ చేస్తోంది.వీరి టార్గెట్ వ్యాపారం లేదా ఇతర రంగాల్లో బాగా డబ్బు సంపాదించిన వారి పిల్లలే. వారి ఫోన్ నంబర్లను సేకరించే ఈ ముఠా, వారికి మిస్డ్ కాల్ ఇస్తుంది. ఎవరో చేశారని తిరిగి ఫోన్ చేస్తే, అప్పుడు స్రవంతి రంగంలోకి దిగుతుంది. సారీ అండీ అనుకోకుండా వచ్చింది.. అవునూ మీ పేరు ఏంటీ అంటూ మొదలు పెట్టి మత్తు మత్తుగా మాట్లాడుతూ..వివరాలు సేకరిస్తుంది.
వారిని మెల్లిగా మాటల్లోకి దింపి వల్లో వేసుకుంటుంది. ఇక ఎవరైనా ఆకర్షితులైతే, తన ఇంటికి పిలుస్తుంది. ఆమె మాటలు నమ్మి ఇంటికి వెళ్లగానే చిన్నగా తలుపులు వేస్తుంది..అప్పుడు తలుపుకొట్టి లోనికి వచ్చే ప్రకాష్, కిరణ్ లు తాము పోలీసులమని హడావుడి చేస్తూ బెదిరింపులకు దిగుతారు. బిత్తరపోయిన యువకుడిపై కేకలేస్తూ, వారిద్దరికీ అక్రమ సంబంధం అంటగట్టేస్తారు. ఏమీ లేకుంటే తలుపెందుకు వేసుకున్నారని నిలదీస్తారు. కేసు, విచారణ, అరెస్ట్ అంటూ హడావుడి చేస్తారు.
ఇక కంగారులో కాళ్ల బేరానికి వచ్చిన యువకుడి నుంచి డబ్బు డిమాండ్ చేస్తారు. డబ్బు లేకుంటే ఏటీఎం కార్డు, పిన్ నంబర్ తీసుకుని ఖాతాను ఖాళీ చేస్తారు. గుంటూరుకు చెందిన ఇస్మాయిల్ అనే యువకుడు రెండు రోజుల క్రితం స్రవంతి ఇంట్లో ఇదే విధంగా బుక్ అయి, రూ. 13 వేలు సమర్పించుకున్నాడు. అంతే కాదు తన భాగోతాన్ని మొత్తం పోలీసులకు తెలుపుతానని స్రవంతి..ఇస్మాయిల్ ని లక్ష రూపాయలు డిమాండ్ చేసింది. దీంతో ఇస్మాయిల్ చీరాల పోలీసులను ఆశ్రయించగా, వారు నకిలీ పోలీసులను, స్రవంతిని కటకటాల వెనక్కు నెట్టారు. స్రవంతి బాధితులు ఇంకా చాలామందే ఉన్నారని పోలీసు వర్గాలు అంటున్నాయి.
