జీవితంలో ప్రతిరోజూ ప్రతి ఒక్కరూ ఒక్క నిమిషమైనా భవిష్యత్తు గురించి, సక్సెస్ గురించి ఖచ్చితంగా ఆలోచిస్తారు. ఎవరైతే కెరీర్ లో సక్సెస్ సాధిస్తారో వారి భవిష్యత్తు బాగుంటుంది. సక్సెస్ సొంతం చేసుకోలేని వారు జీవితాంతం ఇబ్బందులు పడాల్సి ఉంటుంది. మారుతున్న పోటీ ప్రపంచంలో సక్సెస్ సాధించడం సులువు కాదు. అదే సమయంలో కష్టపడితే ఎంతటి లక్ష్యాన్నైనా సాధించడం అసాధ్యం కూడా కాదు.
నిజమైన చిత్తశుద్ధితో ఎవరైతే కెరీర్ లోనైనా, ఇతర పనుల్లోనైనా కష్టపడతారో వారికి విజయం తప్పక సొంతమవుతుంది. సర్వశక్తులనూ సంపూర్ణంగా ధారబోసి పని చేసేవారు విజయాన్ని సాధించడం తథ్యం. జీవితంలో కొన్ని సందర్భాల్లో ఎంత కష్టపడినా ఆ కష్టానికి తగిన ప్రతిఫలం దక్కకపోవచ్చు. జీవితంలో కష్టాలు, ఓటములు కలకాలం ఉండవు. ఆశతో శ్రమిస్తూ లక్ష్యసాధన దిశగా ముందడుగులు వేయాలి.
కొన్ని సందర్భాల్లో ఓటములు ఎదురైనా శ్రమించిన వారికి విజయం దక్కుతుందని గుర్తుంచుకోవాలి. సత్యాన్ని త్రికరణశుద్దిగా నమ్మితే నెమ్మదిగానైనా సక్సెస్ దరి చేరుతుంది. కార్యశక్తి కంటే, కష్టాలను భరించే శక్తి గణించలేనంత గొప్పది. మనం ఇతరుల విజయాలను చూసి అసూయ చెందకూడదు. ఇతరులు సక్సెస్ అవుతూ మనం సక్సెస్ కాలేకపోతున్నామంటే ఎక్కడ పొరపాట్లు చేస్తున్నామో గ్రహించి వాటిని సరిదిద్దుకోవాలి.
మన విజయం కోసం ఇతరుల నుంచి సహాయసహకారాలు తీసుకోవాలే తప్ప ఇతరులపై పూర్తిగా ఆధారపడకూడదు. చిత్తశుద్ధితో ప్రయత్నలోపం లేకుండా లక్ష్యం వైపు దృష్టి పెట్టాలి. లక్ష్యాలను నిర్దేశించుకుని చిత్తశుద్ధితో కృషి చేస్తే కష్టంతో లక్ష్యాన్ని సాధించడం కష్టమైనా సుసాధ్యంగా సాధించవచ్చు. కొన్ని సందర్భాల్లో ఓటములు ఎదురైనా నిరాశానిస్పృహలకు లోను కాకుండా ప్రయత్నం చేస్తే సక్సెస్ సాధించడం అసాధ్యం కాదు.
